الهروب

منذ فترة ليس بقليلة وانا اعيش الاستقلال الفكرى استطيع الى حد كبير ان اعيش فى هذه الحياه بقوانينى الخاصة وفكرى الخاص قوانين معتقدية وفكرية وتربوية لا انكر ولا اتجاهل مساهمات الوالد و الحياه بتزويدى بيها طيلة حياتى حتى الان.

ولكن الان انا فى غرفة مغلق بابها حتى لا يستطيع دخان سجائر أبى ان يصل الى الذى اخذنى الاحباط الى اعماقه فى اقناعه بالاقلاع عنها, وحتى لا اسمع المشاكل و الخناقات التافهة بين افراد اسرتى.

لأنى لا استطيع ان اجبر ابى على الاقلاع عن التدخين ولا استطيع ان اخبر اختى او امى بان هذه المشاكل لا ترتقى او ان حلولها ببساطة فى تقبل الاتنين باحوال و مشاكل الاخر لكن هذه هى عادة كل بيت

بعد ان تأتينى الوحدة بطلتها البغيضة اخرج مسرعا للخارج اقضى وقت مع اصدقائى او السفر او التصوير اى شىء يلهينى وينسينى رتابة الحياه و العمل الذى مللته ايضاً … لم ادرك الا قريباً ان كل هذه ليس الا هروب من الواقع اصنع كوكبى الخاص حتى توحدت فيه و اصبحت الوحدة و التكرار تغطى الكوكب ومع كل هذا وذاك اصبح كل شىء يحيط بى يطوق رقبتى.

وما ذاد الحياه بغض اصدقائى الذى يمارسون نفس الهروب ويسافرون خارج البلاد ويتركوننى اصارع الروتينية و الهروب من هذه الواقع المرير الذى اعيشه وسط بغض السياسة و الاجواء المشحونة كرهاً و الشعب الذى دائما ما يختار الاسواء لنفسه قبل غيره.

أستطعت الايام السابقة ان احاول استجماع قواى فى اعادة كتابة احلامى الذى نسيتها فى سلاسل التكرار واخذت ما اخذت من قرارات فى اعادة مسار حياتى لمسيرتها الطبيعية نحو السعادة التى نسيتها و التطور المهنى الذى مازلت احلم به. الأن اكتشفت المشكلة و اجرب احدى الطرق لحلها لعله الحل الصحيح

Tagged

كن أنت

هو ليه الواحد مننا
مش بيتوقع انه يبقى عنده الحاجة وعكسها
يعنى ليه متتخيلش انك ممكن تبقى الصفة وعكسها
ليه الناس بتحب تصنف نفسها
انها يا حلوة يا وحشة

البنى ادم لو ادرك انه مجرد بنى ادم يصيب ويخطىء الحياه هاتبقى احلى كتير .. صارح نفسك متكدبش عليها قولها انت مين .. انا شخص عادى فيا الخير و الشر فيا الحب و الكره

فيا الصح و الغلط الفرق بين اللى بيتمادى فى طريق الغلط و الطريق الصح هو عقلك تفكيرك

سيب نفسك تغلط وتتعلم سيب نفسك تبقى على طبيعتها متقيدهاش كن أنت فقط أنت .. واتعلم تبص على نص الكباية المليان

كائن فضائى

انا بنى ادم عادى .. لا مش عادى
انا اصلا مسمينى كائن فضائى انا اصلاً غير منتمى للكوكب ولا المجرة دى انا فى الضلمة جوا بعيد عن المدار الشمسى و الحركات دى انا مش بحب الشمس اصلا عشان اللف حواليها زى الاهبل

ممكن كتير ابقى شبه الناس فى حاجات كتير بس ليا دماغى المستقلة
عن اصحابى وعن عيلتى كمان
يعنى ممكن تلاقينى موافق على افكار دينية سلفية وافكار ليبرالية فى نفس الوقت
انا عندى دستورى الخاص جاى من عقيدتى و اخلاقى وتربيتى
بحب الحياه وعارف دورى فيها
بحلم وبجرى احقق احلامى
بغلط وبفشل وساعات بنجح
فيه ناس شيفانى ناجح
مع انى مش شايفنى ناجح
لسه كتير على الكلمة دى … لسه برده مأثرتش فى ناس كتير
بضيع وقت كتير
لكن لما بشتغل بنجز الى حد ما
بحب الفن و الاغانى و الموسيقى
وبحب انى اروح اصلى و اقرأ قرأن
بحب ابقى فضولى بس فى نفس الوقت
انا اشهر واحد فى الدنيا وسط اصحابى
مستمع بس .. بحب اسمع الناس اوى و اعرف هما بيفكرو ازاى
عمرى ما طلبت اعرف حاجة مش مهم اعرفها لكن برده ساعات ببقى غلس
بحب الهدوء بس ساعات ببقا مجنون وبخبط وبلعب وبجرى
بحب البحر بشوف فيه نفسى
بحب اسكندرية بحب الحب والعشق ومش باعتبرها نحنحا
بس مؤمن بفكرة ان الحب مع الجواز شىء اساسى يعنى عمرى ما فكرت ان اللى هاحبها دى مش هاتجوزها … ديما لما بفكر فى حد بشوفها زوجتى هاتنفعنى هى دى اللى هاتبقى شريكة حياتى؟

تركيبة مختلفة ممكن اعجب مليون واحد ومليون غيرهم يكرهونى

مش بحب اتعامل مع حد مش بحبه بيبان عليا اوى انى مش طايقه ما بحبش ابقى بوشين بس فى نفس الوقت ساعات بعرف

بس انا مبسوط بالكائن الموجود جوايا تركيبة مخلطة كدا بحب التغير مش بطيق افضل على موود واحد … كلمة تبسطنى وكلمة ترمينى ع الارض

انا كدا ميتو كائن فضائى

 

 

 

Tagged ,

مصر الى أين؟

الجيش و الشعب ايد واحدة … هتاف تم ترديده مع غروب يوم الغضب يوم 28 يناير حين هربت افراد الامن و الشرطة وبدأت خطط التخويف و الفراغ الامنى تظهر لعلها

تفلح فى اجهاض الثورة و حماسها ولكن كان الشباب المصرى اكثر واعيا وقتها وكان المطلب و الهدف واحد .. الا ان انتهت الثمانى عشر يوما وبدأت فترة من التخبط .. فى بداية الامر وربما يكون الاخير اؤكد ان افراد جماعة الاخوان كانت كتف بكتف يد بيد من يوم 28 وحتى اواخر ال 18 صوتنا واحد وهدفنا واحد الا ان بدأت فترة التخبط وحتى وقتنا هذا .

الان وفى وجهة نظرى بعد ان ماتت الثورة و بين اختيارين لا يمثلون الثورة نهائى دعونا نسرد اخطاء الجميع .. للأسف الجميع اخطأ حتى وصلنا لما وصلنا له .. بدأ المجلس العسكرى حامى للثورة و بدأ الاعلام يتغير ويتلون سريعا وبدأ ينشر فكرة ان المجلس العسكرى حامى الثورة خلونى اقولكم انه بالفعل كان ايضا من اسباب نجاحنا فى ال 18 يوم – احقاقاً للحق – ولكن كان له اهداف اخرى اهمها انه كان غير راضى بوجود جمال على ابواب الرئاسة كيف لهيبة الجيش ان يكون خاضع لشخص مدنى فا ضغط حتى نال ما اراد وتوقع ان الدفة باتت بين يديه الا ان صُدم برد فعل الشباب ولكن سرعان ما اكتسب قوته مرة اخرى عندما تلاقت المصالح مع جماعة الاخوان كل منهما اراد السلطة حتى لو فوق الدماء وكل طرف داعبته احلامه انها مسئلة وقت ويتفوق على الاخر ولكن للأسف من غباوة الجماعة هو من صدق انه يستطيع ان ينافس المجلس العسكرى طرف حالم وطرف يملك السلطة كانت مجازفة خسر بها الشارع بدأت من مهازل شوارع محمد محمود و مجلس الوزراء وماسبيرو .

الجماعة عندما ارتمت فى احضان المجلس طمعاً فى سلطة و نزلت تحتفل بالثورة وتجاهلت الدماء سعياً وراء كراسى مجلس الشعب لم تكن تعلم ان رصيدها ينفذ وكذلك رصيد المجلس العسكرى مع الثوار وبعض عناصر الكنبة المناصرة للثورة حتى وصلنا لما نحن عليه الان .. الجميع من الطرفين يتغزل فى الثورة ولا كأنها بنت اخته .. المجلس العسكرى ولعيبه شفيق بدأ يتغنى بالثورة و الثوار والبرادعى بعد ان اشبعهم سباب ومؤمرات ودماء … والمرشد ولعيبه الاحتياطى محمد مرسى بعد ان قتل الثورة فى مهدها وبعد ان خون وخان الثوار والثورة  … بدأ الان يتغزل فى الواد المؤمن – البرادعى – و البنت المؤمنه – المتعرية – والثوار اللى بشكل او بأخر شارك فى موتهم بصمته البغيض.

من باب احقاقاً للحق فنحن ايضا كا ثوار غلطنا غلطات فادحة .. فنحن نعلم ان الروح الثورية لم تكن عند الاخوان كاقادة نهائى ومع ذلك تخلينا عن ثوريتنا وتخيلنا ان فساد دولة 30 عام متلخص فى تنظيف الميدان ونروح بيوتنا وشغلنا!! مسمعناش كلام الروح الثورية وتفرقنا ليبرالين و علمانين وسلفين فقدنا روح الميدان و العلم الواحد .. اذكر عندما نزلت الميدان قبل رمضان ورأيت اعلام الاشتراكين واعلام السلفين و الالتراس اسود الميدان بلا شك, وقلة قليلة رافعة علم مصر!!! فقدنا طريقنا حتى خسرنا مجلس الشعب ودخلها اشخاص لا يفقهون شيء الا من رحم ربى و هلكنا بخسارتنا انتخابات الرئاسة الحلم الاخير .. لم نتفق, كنت احترم ابو الفتوح وحمدين وخالد على ولكن للأسف الجميع اخذته الجلالة وطمع فى الكرسى متناسيا الاهداف المتفق عليها

وكما قلت اكثر من مرة  بعد ما ظهرت نتايج المرحلة الاولى من الانتخابات انى مكنتش مع ولا مطلب من المطالب المطروحة حتى الان لا مع مجلس رئاسى ولا قانون العزل ومنزلتش المظاهرات غير مرة متفرج – كأول مرة اتقمص دور بغيض كنت اكره وهو المتفرج – بدخولنا الانتخابات بات هناك عقد غير مكتوب وهو انك رضيت بالصندوق فيصل و الصندوق قال للثورة لا .. صعبة صح بس هو ده اللى حصل ولا اصدق وجود تزوير بشكل يغير مجريات الامور بشكل كبير

قانون العزل دعونى اتبعها بضحكة سخرية وتشفى فى الاخوان – معلش اانا بنى ادم مش ملاك – ارجعو معايا شوية كدا من ايام محمد محمود وقبل الانتخابات عندما صرخنا بقانون العزل ونفضتلنا الجماعة لانها كانت وقتها عارفة انها عندها شعبية وعندما تملكت زمام مجلس الشعب لم تتذكره الا عندما اتقرص عليها بدخول عمر سليمان ولأنها كانت تعلم بأن هذا القانون سيبعد الشاطر خارج السباق استعانت بأستبن او بديل وهو مرسى الذى لم يكن اختيار موفق كاشخصية بس ما علينا المهم انها ارتضت او اجبرت ودخلت السباق وهى تعلم ونحن جميعا نعلم بدخول شفيق وموسى ايضا بذلك وللأسف اعطيناه الشرعية بشكل او بأخر حتى اتت الصناديق بهم وقتلت الثورة

الان ومن وجهة نظرى ان مرسى هو الفائز ان اراد الله ذلك فكل منهم سيحافظ على الخمس ملاين الحاصل عليهم وشفيق بشكل او بأخر سيحصد المليونين بتوع صديقه موسى و سيحصد مرسى نسبة كبيرة من اصوات ابو الفتوح ونسبة اقل من اصوات حمدين صباحى وخالد على و الباقى سيبطل او سيظل فى بيته كافى خيره شره لا حبر ولا يحزنون حسابياً وان لم ينزل الخمسون فى المية الذين قاطعو من المرة الاولى سينتصر مرسى … وبالنظر و الهدوء للعالم الخارجى ستجد ان الديمقراطية تفرض التكويش ايون يعنى فرنسا الان تدار بحزب اشتراكى بعد خسارة ساركوزى و تركيا حبيبة الملاين تدار ايضا بحزب واحد اسلامى لكن بدستور علمانى … نأتى بقا للدستور وهو كما قال البرادعى من بعد الثمانى عشر يوما انه اهم شىء وقوبل بشتيمة وانتقادات حادة هو فعلاا الاهم وهو اللى مش كان هايحطنا فى المأزق المنيل بنيلة اللى احنا فيه ده … تدار الولايات المتحدة و فرناس وتركيا ومعظم البلاد الديموقراطية بدستور يعنى لو كان رئيسهم قرد بموز فا هو فى الاخر خاضع للدستور ارادة الشعب و كتابه لكن للأسف وحتى الان وانا اكتب هذه الكلمات قبل اعلان اللجنة الواضعة للدستور غير متفائل بالمرة

اتمنى ان يكون الله معنا واتمنى ان يولى الله الاصلح واتمنى من الله ان لو كنت اخطأت فى حد او تشككت فيه ان يكذبنى فا ما احلى ان ارى كذب توقعاتى بأستقرار و نهضة البلاد بنظام ديموقراطى غير عسكرى او ثيوقراطى

سلام

Tagged ,

اعقل

 

السلام عليكم

النهاردة مش هاتكلم عن حاجة سياسية او تشجيعية اكتر من انها مناقشة لموضوع ما .. الموضوع من الموضوعات اللى بعض الناس بيسموها نحنحة .. الكلام عن الارتباط و الحب

كلنا كا شباب من ولاد وبنات فى حتة فى دماغنا ديما بتزقنا للأرتباط فى ناس بتنجرف بسزاجة وناس بتبقى عندها مبادىء وخطوط حمراا ماحدش بيعديها لكن تعالو نفكر شوية فى بعض التفاصيل

كل واحد مننا عنده فكرة عن الارتباط و ليه عايز يرتبط هاخدنى كا مثال بما انى انا اللى بتكلم – حد ليه شوق فى حاجة – انا لما بفكر ارتبط انا بفكر بشكل مختلف يعنى مش بسيب لشهواتى التفكير بمعنى اصح و اكثر صراحة يعنى لا يستهوينى الانثى الاكثر انوثة الاوفر او اللى بتبقى ضاربة تلت اربع مكياج الدنيا فى وشها – ده مش معناه انى عايز ارتبط بقردة النوع ده للمعاكسة فقط – لكن انا اصلاا بفكر بشكل مختلف ممكن يكون مختلف عن معاليك او متشابه جداا .. انا بختار رفيق لرحلة بما يحمله من صفات ارتاح معاها وانا فى طريقى لحلمى ولحلمها هى كمان, ده يديك سبب انا ليه عندى موضوع الجمال ده مرتبة تانية لكنها مهمة زى ما قلت اكيد مش هاتجوز قردة

فى الفترات الاخيرة او تجربتى الوحيدة اللى كانت حقيقية كانت للأسف ايون للأسف بقلبى وده كان اكبر غلط! ليه غلط لان اكتشفت ان العاطفة لما تشتغل بعنف بتضيف على شخصيتك حاجات مش مستحبة ومن اهمها على الاطلاق الضعف .. بتضعف جداا ادام الشخص اللى بتحبه لحد الطفولية وده هايظهر حاجات مش لطيفة انها تظهر لاى حد عشان كدا بقول ان للأسف كان بقلبى.

الضعف ده خلانى الغى عقلى فى كثير من الحاجات – المشاكل يعنى – وده سبب فى مشاكل اكبر لانى لو كنت حكمت عقلى كان ممكن تكون المشاكل دى اتفه ما يمكن لكن خلينا نعترف انك بشكل او بأخر هاتضعف هاتضعف ده شىء غير قابل للجدال حتى لو انت مين خليك صادق مع نفسك.

طيب ايه الحل هو بقا اللى انا عامل الموضوع ده عشانه اصلاا الحل ده من وجهة نظرى يعنى ممكن تكون صح او لا .. مفتوح النقاش فى اللى هاقوله ده

انا شايف ان الحل هو وجود عقلك فى اكتر من سبعين فى المية من الاختيار من الاول وانت ع البر .. اوعى تسيب لقلبك الاختيار – عارف حملة اوعى ايون اوعى تجرب – بما اننا اتفقنا – على اعتبار اننا اتفقنا – اننا بنضعف بنضعف لا محالة فا اضعف ادام حد يقدر ضعفك حد يضعف هو كمان عشان يحققلك اللى انت عايزه حد مايستغلش ضعفك انه يستقوى عليك حد يقدر انت بتعمل ايه عشانه عشان يقدر ضعفك وانكسارك ادامه ده مش ذل لكن للأسف ده الحب .. بحكم تجربتى القصيرة جداا بحجم اد ايه كئابة ادتنى فى وشى الا انها كانت تجربة اتعلمت منها حاجات كتيرة اهمها انى مخفش انى اقول انى مريت بتجربة فاشلة الا انى اتعلمت منها ازاى بقا مافشلش عرفت طريقة للفشل زى ما بيتقال .. عرفت ازاى اتعامل و امتى ابقى شرير و امتى ابقى نحنوح🙂 – اتمنى – قدرت نعمة العقل اللى ربنا قدمهالنا عشان نستخدمه فى كل تفصيلة فى الدنيا

حكم عقلك ومتخليش حد يستغل ضعفك او انت تستغل ضعف حد .. كن على اد المسؤلية فقط وبس

بس خلاص

مش فاهمنى!

ايه بقا! مالك؟

كتير بحس بالخنقة و الملل اتعودت عليه عادى كا مواطن مصرى وشاب كمان وعدى على مرحلة الثانوية العامة … طبيعى جداااا انى امر بحلات اكتئاب وعلاقات فاشلة وعلاقات ناجحة

بقالى فترة مش مرتاح مش مكتئب ومش سعيد معنديش توصيف للحالة اللى عايشها الصراحة لو قلت اى وصف هاكون كداب

انا مليت من كل القيود ومليت من كل اللى الحاجات اللى احنا خدنها مسلمات مليت من كونى انا! … عايز اكون حاجة مختلفة مليت عاداتى اليومية ومليت حتى شغلى مليت التاكسى اللى بركبه بقيت عايز امشى ولما بامشى ببقا عايز اركب رخامة بقا اللى انا فيه ده ماتحلش برحلة لاى مكان مفتوح بالعكس بروح هناك بيبقى الاستمتاع وقتى جداااااااااا خلص خلصت الحكاية معدتش زى زمان حاسس حلاوة الشىء … فقدت حتى انا حلمى ايه هل انا حلمى انى ابقى معايا فلوس ولا يبقى معايا علم ولا الاتنين طيب ازاى اوصل و ازاى ماوصلش … رغم انى ابدو لكثير من الناس شخص متفائل الا انى بدأت احس ان زى بلياتشو بضحك من برا وجوايا جروح الدنيا و الدين … حالة من الـــ مش عارف ايه

مجروح على مهموم على مخنوق على وحدة على حاجات تفرح بس مش حاسس بطعمها …. اول مرة انا مكنش فاهمنى طبيعى جداا انك تكون مش مفهوم لغيرك لكن لما متبقاش فاهم نفسك بيخلى مؤشر حياتك يحمر ويكسر عدادات الاحساس و اللذة فى حياتك؟

هل حل كل اللى انا فيه ده .. انت عايز ايه؟ ده لو انا شوفت حد زيي كدا هاسأله كدا مع نوع من الفلسفة اللى خدتها من كتب التفاؤل الى زهقت من حروفها هاقنعه ان الحياه فيها الوان كتير ماتشفتش وهاخليه مزقطط … مش عارف اعمل كدا مع نفسى مش عارف اكون عندى هذا الثقل من القبح الفكرى وفضلات مرمطة الحياه واكون قادر افتكر انا حلمى ايه؟؟

فى العادة مش بنشر الحاجات اللى فيها سودويات زى دى … بس هانشرها بقا رخامة فيها

Smile :)

بقالى كام يوم بتسأل سؤال واحد مالك مبسوط كدا ؟؟ شكلك مبسوط النهاردة ليه ؟ سؤال يصحبه غمزة

وكأن الغمزة اللى هى مفهوم عنها انها الحب هو الشىء الوحيد اللى بيحققلك السعادة وكأنك ضعيف اوى لدرجة ان لازم حد تانى يسعد حياتك؟

لا الاجابة بقا انى قررت انى ابقى اقوى منك اه مستناش حد او شغل يسعدنى قررت املى كوبايتى بايدى مش استنى حد قررت اضحك واعيش كل لحظة فى حياتى لانها مش هاترجع تانى

كل ساعة بتروح فى حياتك مش هاترجع لكن الفرص بتروح وتيجى لا وبتيجى احسن كمان صدقنى … ملعون ابو النكد و الغم واللى ينكد عليا ولا ميسعدنيش

انا قررت ابقا نفسى قررت ابقى اقوى قررت اعيش اليوم كأنه اخر يوم فى حياتى اضحك و اخرج و العب و اكل اكلة غالية جداا و ابقى مبسوط قررت اجيب هدوم زى منا عايز قررت اقراا فى اللى بحبه و اشتغل بحب و بسعادة و ابتسم فى وش كل واحد لعل وعسى اكون سبب ان وشه يتفرد ويبتسم

اوعى تقول انا تعيس انا حزين انا مكتئب ده بالظبط زى ما تجيب ورقة بيضة وتحدف عليها تراب ما هى هاتتوسخ ما تحاول تحدف عليها ورد تعطرها تنضفها

اوعى تستنى حد يسعدك انت مش ناقص ايد ولا رجل ولا عقل عشان تسعد نفسك بالعكس فى ناس معندهاش االلى عندك ومبسوطين جداااااا امال انت يا حزين مالك بقا؟؟

انا قررت انى اعيش حياتى كمان قررت ان لحظة موتى اموت وانا مبتسم اصل انا مش هاعيش اللحظة دى مرتين … ابتسم

Tagged

باب النجار مخلع

باب النجار مخلع كلمة كل ما اسمعها احسها اكبر من انها تتقال فى موقف خفيف  بحسها كلمة تقيلة كلمة تفسر وظيفة البنى ادم فى الدنيا

بمعنى ان طبيعى انك لما تلاقى حد واقع فى مشكلة تحاول تساعده  والالطف انك ممكن تقوله افكار بديهية جدا تلاقيها غايبة عنه ايون ليه يعنى ؟

لان فى بعض الاحيان او فى الاغلب الشخص اللى بيقع فى المشكلة بيبقى منظوره للموقف صغير اوى من على الارض فى وسط المشاكل مع انك لو طلعت بالكاميرا شوية للارض كلها هاتشوف تفاصيل كتير جداا بديهية اوى فا طبيعى تلاقى حاجات بديهية اوى فى مشكلة صديقك تسمع منه وتحلها … الطبيعى  اكتر انك نفسك لما تقع فى مشكلة تحسك مشلول مش فاهم ايه العمل و ايه اللى يحصل تستعين بصديق ممكن تكون مساعده اول امبارح يساعدك لنفس الاسباب .. اه منطقى جداا ان الانسان يحل مشاكله بنفسه بس المنطقى اكتر ان حل اللى شايف الموضوع من منظور اكبر هو اكثر واقعية و اكثر صحة

ده بيفكرنى بقا بدور البنى ادم فى الدنيا انه يساعد غير وغيره يساعد غيره وهاكذا ربنا جمعنا سواا ف الحياه مش لسبب اكتر مننا اننا نتعلم مننا ونشوف مواقف ونساعد بعض فى اننا نعمر الارض مثلاا تعمير بقا تنموى تربوى تقنى اى تنمية وتعمير

الحمد لله ان ربنا رزقنا بينا

اها متنساش ابتسامتك فى وش اى حد تعرفه او لا مش بس صدقة لا هاتساعده كتير اوعى تبخل على حد

بس

سلام

وحشتينى

وحشتينى .. وحشنى دلعك و ابتسامتك .. وحشنى شوقى ليكى بعد ثانية من وداعنا … وحشنى اسمك على الموبيل وحشنى صورتك فى عنياا .. وحشنى احلامى معاكى و موتى فى حبك .. وحشنى عٍندك وكٍبرك

وحشنى رنتك و صوتك وحشنى حتى غلاستك وشقاوتك

وحشنى غيرتك و كلمة هادبحك … وحشنى لمعة عنيكى وانا بقولك بحبك

الصمود

سلطة تنفيذية خاينة للثورة و سلطة تشريعية خاينة للثوار و الشهداء و شعب راضى باى شىء كان خيراً او شراً و اعلام سفيه! .. و الامل قلة قليلة مندسة

 تحية لكل ثائر صامد تحية لكل ثائر صوته راح من كلمة سلمية

وتحية لكل نقطة دم نزلت من شهيد او مصاب عشانكم شايلين روحنا على كفنا عشان مطالبكم وحقوقكم قابلين يتقال علينا بلطجية وخونة وعملاء

فخور انى بلطجى على كل فاسد

وفخور انى عميل للحق و الحرية و الكرامة

و فخور انى خاين لكل اللى اتربينا عليه من خوف و خضوع للظلم

 

Tagged , ,
Follow

Get every new post delivered to your Inbox.