Tag Archives: Egypt

مصر الى أين؟

الجيش و الشعب ايد واحدة … هتاف تم ترديده مع غروب يوم الغضب يوم 28 يناير حين هربت افراد الامن و الشرطة وبدأت خطط التخويف و الفراغ الامنى تظهر لعلها

تفلح فى اجهاض الثورة و حماسها ولكن كان الشباب المصرى اكثر واعيا وقتها وكان المطلب و الهدف واحد .. الا ان انتهت الثمانى عشر يوما وبدأت فترة من التخبط .. فى بداية الامر وربما يكون الاخير اؤكد ان افراد جماعة الاخوان كانت كتف بكتف يد بيد من يوم 28 وحتى اواخر ال 18 صوتنا واحد وهدفنا واحد الا ان بدأت فترة التخبط وحتى وقتنا هذا .

الان وفى وجهة نظرى بعد ان ماتت الثورة و بين اختيارين لا يمثلون الثورة نهائى دعونا نسرد اخطاء الجميع .. للأسف الجميع اخطأ حتى وصلنا لما وصلنا له .. بدأ المجلس العسكرى حامى للثورة و بدأ الاعلام يتغير ويتلون سريعا وبدأ ينشر فكرة ان المجلس العسكرى حامى الثورة خلونى اقولكم انه بالفعل كان ايضا من اسباب نجاحنا فى ال 18 يوم – احقاقاً للحق – ولكن كان له اهداف اخرى اهمها انه كان غير راضى بوجود جمال على ابواب الرئاسة كيف لهيبة الجيش ان يكون خاضع لشخص مدنى فا ضغط حتى نال ما اراد وتوقع ان الدفة باتت بين يديه الا ان صُدم برد فعل الشباب ولكن سرعان ما اكتسب قوته مرة اخرى عندما تلاقت المصالح مع جماعة الاخوان كل منهما اراد السلطة حتى لو فوق الدماء وكل طرف داعبته احلامه انها مسئلة وقت ويتفوق على الاخر ولكن للأسف من غباوة الجماعة هو من صدق انه يستطيع ان ينافس المجلس العسكرى طرف حالم وطرف يملك السلطة كانت مجازفة خسر بها الشارع بدأت من مهازل شوارع محمد محمود و مجلس الوزراء وماسبيرو .

الجماعة عندما ارتمت فى احضان المجلس طمعاً فى سلطة و نزلت تحتفل بالثورة وتجاهلت الدماء سعياً وراء كراسى مجلس الشعب لم تكن تعلم ان رصيدها ينفذ وكذلك رصيد المجلس العسكرى مع الثوار وبعض عناصر الكنبة المناصرة للثورة حتى وصلنا لما نحن عليه الان .. الجميع من الطرفين يتغزل فى الثورة ولا كأنها بنت اخته .. المجلس العسكرى ولعيبه شفيق بدأ يتغنى بالثورة و الثوار والبرادعى بعد ان اشبعهم سباب ومؤمرات ودماء … والمرشد ولعيبه الاحتياطى محمد مرسى بعد ان قتل الثورة فى مهدها وبعد ان خون وخان الثوار والثورة  … بدأ الان يتغزل فى الواد المؤمن – البرادعى – و البنت المؤمنه – المتعرية – والثوار اللى بشكل او بأخر شارك فى موتهم بصمته البغيض.

من باب احقاقاً للحق فنحن ايضا كا ثوار غلطنا غلطات فادحة .. فنحن نعلم ان الروح الثورية لم تكن عند الاخوان كاقادة نهائى ومع ذلك تخلينا عن ثوريتنا وتخيلنا ان فساد دولة 30 عام متلخص فى تنظيف الميدان ونروح بيوتنا وشغلنا!! مسمعناش كلام الروح الثورية وتفرقنا ليبرالين و علمانين وسلفين فقدنا روح الميدان و العلم الواحد .. اذكر عندما نزلت الميدان قبل رمضان ورأيت اعلام الاشتراكين واعلام السلفين و الالتراس اسود الميدان بلا شك, وقلة قليلة رافعة علم مصر!!! فقدنا طريقنا حتى خسرنا مجلس الشعب ودخلها اشخاص لا يفقهون شيء الا من رحم ربى و هلكنا بخسارتنا انتخابات الرئاسة الحلم الاخير .. لم نتفق, كنت احترم ابو الفتوح وحمدين وخالد على ولكن للأسف الجميع اخذته الجلالة وطمع فى الكرسى متناسيا الاهداف المتفق عليها

وكما قلت اكثر من مرة  بعد ما ظهرت نتايج المرحلة الاولى من الانتخابات انى مكنتش مع ولا مطلب من المطالب المطروحة حتى الان لا مع مجلس رئاسى ولا قانون العزل ومنزلتش المظاهرات غير مرة متفرج – كأول مرة اتقمص دور بغيض كنت اكره وهو المتفرج – بدخولنا الانتخابات بات هناك عقد غير مكتوب وهو انك رضيت بالصندوق فيصل و الصندوق قال للثورة لا .. صعبة صح بس هو ده اللى حصل ولا اصدق وجود تزوير بشكل يغير مجريات الامور بشكل كبير

قانون العزل دعونى اتبعها بضحكة سخرية وتشفى فى الاخوان – معلش اانا بنى ادم مش ملاك – ارجعو معايا شوية كدا من ايام محمد محمود وقبل الانتخابات عندما صرخنا بقانون العزل ونفضتلنا الجماعة لانها كانت وقتها عارفة انها عندها شعبية وعندما تملكت زمام مجلس الشعب لم تتذكره الا عندما اتقرص عليها بدخول عمر سليمان ولأنها كانت تعلم بأن هذا القانون سيبعد الشاطر خارج السباق استعانت بأستبن او بديل وهو مرسى الذى لم يكن اختيار موفق كاشخصية بس ما علينا المهم انها ارتضت او اجبرت ودخلت السباق وهى تعلم ونحن جميعا نعلم بدخول شفيق وموسى ايضا بذلك وللأسف اعطيناه الشرعية بشكل او بأخر حتى اتت الصناديق بهم وقتلت الثورة

الان ومن وجهة نظرى ان مرسى هو الفائز ان اراد الله ذلك فكل منهم سيحافظ على الخمس ملاين الحاصل عليهم وشفيق بشكل او بأخر سيحصد المليونين بتوع صديقه موسى و سيحصد مرسى نسبة كبيرة من اصوات ابو الفتوح ونسبة اقل من اصوات حمدين صباحى وخالد على و الباقى سيبطل او سيظل فى بيته كافى خيره شره لا حبر ولا يحزنون حسابياً وان لم ينزل الخمسون فى المية الذين قاطعو من المرة الاولى سينتصر مرسى … وبالنظر و الهدوء للعالم الخارجى ستجد ان الديمقراطية تفرض التكويش ايون يعنى فرنسا الان تدار بحزب اشتراكى بعد خسارة ساركوزى و تركيا حبيبة الملاين تدار ايضا بحزب واحد اسلامى لكن بدستور علمانى … نأتى بقا للدستور وهو كما قال البرادعى من بعد الثمانى عشر يوما انه اهم شىء وقوبل بشتيمة وانتقادات حادة هو فعلاا الاهم وهو اللى مش كان هايحطنا فى المأزق المنيل بنيلة اللى احنا فيه ده … تدار الولايات المتحدة و فرناس وتركيا ومعظم البلاد الديموقراطية بدستور يعنى لو كان رئيسهم قرد بموز فا هو فى الاخر خاضع للدستور ارادة الشعب و كتابه لكن للأسف وحتى الان وانا اكتب هذه الكلمات قبل اعلان اللجنة الواضعة للدستور غير متفائل بالمرة

اتمنى ان يكون الله معنا واتمنى ان يولى الله الاصلح واتمنى من الله ان لو كنت اخطأت فى حد او تشككت فيه ان يكذبنى فا ما احلى ان ارى كذب توقعاتى بأستقرار و نهضة البلاد بنظام ديموقراطى غير عسكرى او ثيوقراطى

سلام

Tagged ,

الصمود

سلطة تنفيذية خاينة للثورة و سلطة تشريعية خاينة للثوار و الشهداء و شعب راضى باى شىء كان خيراً او شراً و اعلام سفيه! .. و الامل قلة قليلة مندسة

 تحية لكل ثائر صامد تحية لكل ثائر صوته راح من كلمة سلمية

وتحية لكل نقطة دم نزلت من شهيد او مصاب عشانكم شايلين روحنا على كفنا عشان مطالبكم وحقوقكم قابلين يتقال علينا بلطجية وخونة وعملاء

فخور انى بلطجى على كل فاسد

وفخور انى عميل للحق و الحرية و الكرامة

و فخور انى خاين لكل اللى اتربينا عليه من خوف و خضوع للظلم

 

Tagged , ,

الثـــــوار يحكمون

امبارح كنت فى التحرير ميدان العزة و الشرف و النضال الشعبى ميدان الفضيلة .. ميدان الثورة

كابتن كابتن هو يعنى ايه ثورة؟

الثورة يعنى انك تنتفض متحمساا لتقود البلاد لتغيرالنظام بالكامل حكومته دستوره سلطاته بابا غنوجه .. طيب هو انا هاحارب لوحدى هاثور لوحدى لا هايبقى معاك ناس زيك متحمسين جدا مش بعيد ومش منطقى انك تنكر انه هايبقى عددكم اقل او نسبة معقولة من الشعب يعنى الشعب كله مش هايثور + ان طبيعى هاتلاقى فى النص ناس بتحاول تخطفك لطريق انت مش عايزه بس ده هايبقى زى شوائب وسط سريان مياا مندفع لاهيجى معاك او هايترمى فى اى داهية – سيبك منهم – دائماا ما يكون التفكير الثورى هو القائد ايون دائما وتاريخيا يقود الشعب فى الثورة الثوار فقط.

ده نظرا لطبيعة البنى ادمين المختلفة فى منهم خايف بس معاك بقلبه وفى ناس تعيش وتموت وتبوس الذل وتبقى سعيدة وفى ناس تشاهد الاحداث كانه ماتش بوكس وهاتشجع اللى بيكسب بحرقة تكاد تتخيل انها كانت معاه من الاول لكن سرعان ما تنقلب ضده ان خسر!

طيب ..  وليه العيال اللى فى التحرير مش بيمشو لحد الوقتى هما مش خدو اللى عايزينه هو ايه بقا مش عايزين استقرار!؟

سؤال وجيه ومنطقى : لكن خلينى اشرحلك جوانب الموضوع من وجهة نظرى الشخصية الغير مسيسة باى صوباع خارجى او اى شىء.. نزلت التحرير او منزلتش شوفت فيديوهات الضرب و القتل و السحل او مشوفتش مش مهم خلينا نفترض ان كل المشاهد دى مغيرتش مشاعرك او محاستش لسه باللى هناك خلينى اوصفلك .. التفكير المنطقى وانت ادام التلفزيون مش هو المنطقى وانت ادام الموت بمعنى ان الفكر المنطقى نسبى جداا على حسب الموجود حواليك و الاحداث

يعنى الشخص اللى نايم ع الارض فى التحرير و البورش واكل من جتته و الاصابات اللى جسمه بتاكله اكيد المنطق عنده مختلف لانه شاف بعينه الواقع شاف بعينه اللى اتسحل و اترمى شاف بعينه الضرب و الغضب و الانتقام من الجانب الاخر باى منطق تحكم عليه انت وانت بتتفرج ع التلفزيون؟

مش بقولك انزل لان دى بتبقى عن قناعات شخصية فى البنى ادمين لو حاسس انك عايش لقية ونزلولك قيمة هاتنزل .. لكن متحكمش ومتفرضش انت كلامك وتسب اللى فى التحرير! .. جرت العادة يا حضرات ان الثورة احادية التفكير اى لا تدعم الديمقراطية  بمعنى ان الثورة قامت على نظام ديمقراطى لتجعله ديمقراطى ما بين وبين فا هو منحاذ لفكره الى ان يجعلك ديمقراطى او يسلم الراية لاشخاص تختارها الشعب لكن الفترة الانتقالية دائما ما تكون احادية التفكير وده انا شايفه منطقى جداا وله مثال حدث بينا بشكل كبير.

فى الفترة ما بين خطاب مبارك 2 فبراير لحد يوم تنحيه ظل الثوار او قطاع كبير منهم ينادون ارحل ارحل لا بديل عن الرحيل فقام الشعب او قطاع لا يستهان به يقولك لا بقا كفاية وادوله فرصة اخيره لا بقا ده زى ابوك ومينفعش تهينه فى اخر ايامه و مهاترات من دى بالجملة ولكن ظل الثوار مرابطين وعازمين على ان الرحيل هو الحل وتعرضو للسب و الاهانة من حزب الكنبة الثائر ع التلفزيون ولكن بروح الثورة و العقيدة الثورية رفضو كل الكلام ده

وعندما رحل لاقيت كل الشعب المصرى مزقطط وفرحان و البيوت ترفع اعلام مصر فى البلكونات و الميادين تمتلىء على غير العادة وصخب وفرح!! يوميها انا وقفت مزهول الصراحة بس قولت الحمد لله اديهم فهمو

ما يحدث الان هو صورة بالكاربون لما حدث وقتها … الثوار انتظرو 10 شهور بالتمام و الكمال و مطالب الثورة اللى المجلس الموقر جاى يحميها مش يقرر بتحصل بالقطارة ولازم تكون بموجب مليونية لا يقل عددها على اتنين مليون و عندكم امثلة زى المحاكمات و المحاكامات العلنية  .. بدون ثوار التحرير مكنش ده هايحصل ولا انكار لده ولا اقصاء لفصيل او تيار عن اخر 

والان وقامت المحافظات من اسيوط و اسوان لاسكندرية ودمياط و مطروح و السويس … الشعب ينتفض طالب تسليم السلطة لمجلس مدنى و الان ما يحدث هو التفاف على مطالب الشعب بتعين رئيس حكومة صورة بس عشان يقدر يلاعبك تانى اى نعم هى صورة بالكاربون .. وعلت الاصوات مرة اخرى الاستقرار بقا عايزين نشتغل الاقتصاد و و و .. لا انكر ان كل ما تقولوه حقيقة ولكننا فى ثورة يا حضرات اى ان الثوار يحكمون حتى تسليم السلطة لرئيس منتخب من الشعب

دى وجهة نظرى تختلف او تتفق معايا شىء مقبول

 لو عندكم وقت اسمعو دى

دخـــــانك الكداب مهما على هايروح … وانا عينى لو راحت انا راح اشوف بالروح

 

Tagged , , ,

فكرة … هدفها مصر قوية

 

السلام عليكم

كلنا الوقتى انقسمنا لاكثر من فئة  , فئة فرحانة بالوضع واخرى متشائمة و اخرى تحاول تضع حلول و كا العادة توجد فئة تغييييييييظ بتتفرج كأنه فلم عربى

ولكن يجب علينا احنا كا شباب مثقف اننا ننشر التوعية ونعيد هيكلة نفسنا وعاداتنا اللى فرضها علينا نظام فاسد 30 عام ولذلك اقدم اقتراح ناقشت فيه البعض و بعض الاصدقاء عجبهم الفكرة .

انا شخص عادى شاب يبلغ من العمر 21 سنة اكيد مش خبير سياسى او حقوقى ولا حتى ناشط سياسى , انا مجرد شاب لمس الفساد فى دولته ولمس وسائل القمع فا بحاول ايجاد حل يعنى يخرجنا من الازمة , بس انا مش باصص على الفترة الانتقالية انا باصص على الفترة ما بعد الانتقالية او بما تسمى فترة الاستقرار و البناء وعندى فكرة ربما تكون صح او غلط .

اولاا الفكرة هدفها الاساسى هو استخدام موارد الدولة البشرية فى المشاركة و التفعيل و التنفيذ لفترة نهضة مقبلة ل دولتنا و الوطن العربى

ثانياا : انا شايف ان الرئيس القادم لازم نخلى سلطاته محدودة ميبقاش الحاكم الناهى و نرجع تانى لنظرية الابوية او الالوهية – لو بتتكتب كدا – مع تواجد مجموعة من المستشارين يحددها الرئيس وتكون قائمة على الكفائات مش القرايب !! بواضعنا الحالى افضل ان تتضمن الاسماء التالية .

د/فاروق الباز , د/غنيم , د/زويل,الاستاذ عمرو موسى , الاستاذ عمرو خالد

الاستاذ فروق جويدة , و شخص عسكرى و شاب ممثل لجيل الشباب

مهمة اللجنة دى هى مساعدة الرئيس فى ادارة البلاد و خلق منهج تطويرى تنموى للبلاد للفترة المقبلة مع تحديد جدول زمنى

يأتى بعد هذه اللجنة الحكومة من رئيس للوزراء ويكون ضمن المستشرين وهمزة الوصل و مجموعة من الوزراء هدفهم ادارة المؤساسات الحكومية بشكل يساعد اللجنة الاستشارية لتحقيق منهجهم

حد يقولى طيب و ايه لازمة الوزراا ؟؟ لا دورهم كبير بس خلينا عقلانين وتعالى نشوف غلطات الماضى

الانسان الوزير هو بنى ادم صعب عليه ان يقوم بأدارة المؤساسات الحكومية + انى افرض عليه انه يطلع افكار و تكون ممنهجة هابقى بطلب المستحيل

بمعنى ان وظيفة لجنة المستشارين هى

Idea Generator

بشكل يخدم منهج مقرر ومحدد بمدة زمنية

تمام

نيجى لمجلس الشعب .. من غلطات الماضى هو اعتماد الحزب الوطنى او مجلس الشعب سابقاا

على الغير متعلمين لا اعيب فيهم لكن فى نظرى هم مش الاكفاء فى اداء مهنتهم مش الاكفاء فى فهم و ادراك مدى قداسة و قيمة مهمتهم فى المجلس لذلك يجب انه يكون فى قوانين للمجلس للناس المرشحة ليه معلش هو مش مولد و ان يكون المجلس خالى من الوزراء او المستشارين ويكون قاصر على المتعلمين و المثقفين الغيورين ع البلد و اللى هدفهم وو ظفيتهم بتحتم عليهم ينزلو لدوائرهم يكشفو الفساد و المناطق التى تحتاج دعم و و و

اعتقد ان التلت تروس دى لو دارت بشكل منطقى و صحيح احنا ممكن نحقق ثورة و نهضة علمية ممنهجة فى جميع المجلات

ممكن يكون كلامى عام وومكن يكون فى نظر الناس خيالى او حتى فكرة سيئة

انا محتاج الناس تناقشنى هل ده لو حصل ايه مشاكله ؟؟ و ايه مميزاته ؟؟  الناس اللى شايفة ان الكلام ممنطق ومحتاج تفعيل ياريت تنشره لعل وعسى نلاقى اذان صاغية تحقق ده … بلدنا الوقتى عاملة زى البيت المتهالك و احنا اخترنا نهده عشان نبنيه صح فا نبنيه على اساس قوى عشان نقدر نعلى

سلام

Tagged , ,

#Jan25

السلام عليكم

مبرووووووووووووووووووووووووووووووووووووك لكل الشعب المصرى بكل فئاته بكل طوائفه

انتهى عصر الفساد و الظلم و القمع

الان صوت الحرية ينادى

مش هاتكلم فى السياسة ولا اسرد قصص وحكيات من اللى قبلتنى

بس انا فخور بشعب بلدى و صوت الحرية اللى خرج فجر كل الجسور

فخور كونى شخص شارك فى الثورة دى رغم عدم استطاعتى المشاركة من ميدان التحرير

فخور بدمعة انكسار و احباط ودمعة فرح ونصر

اولاا انا اسف لكل من عارضونى وكانو غير موافقين على رائيي فى استكمال الثورة او الاستمرار فى الاعتصام

هما برده كانو بيحبو البلد وخايفين عليها بس كل واحد و قدر فهمه للاحداث

عايز اقول ان الاوان يا رجالة و بنات مصر

كنت غير مقتنع بمبداء ابداء بنفسك ده قبل 25 يناير او 11 فبراير

الان عامل بلدك دى كأنها بيتك نضفها اخلصلها فى شغلك فى تعاملاتك انصح الناس بزوق كلم الناس بأحترام ديما خليك متسامح الفترة القادمة ستكون عصيبة على ما اعتقد وعشان كدا لازم كلنا نكون ونفضل ايد واحدة كبار وصغار مسلمين ومسيحين واى ديانات تانية موجودة مادمت مصرى فانت صاحب بلد وصاحب مكان ورائى … لازم نساعد الجيش فى تحقيق مطالبنا اللى باتت قريبة ان شاء الله

يااااااااااارب ياااااااااااااارب مايفرقنا شىء

ياااااااارب نفضل ايد واحدة صوت واحد يارب تختفى التفاهة زى ما اختفت الفترة اللى فاتت من سهوكة ومعاكسات وتحرشات لازم مصر يبان ان شعبها شعب ليه هيبته

بالمناسبة يوم 9 فبراير كان العيد التانى لمدونتى

يارب الباقى من العام ده يفضل مختلف وسعيد

سلام

Tagged , ,

مصر مفتاح الحياه

السلام عليكم

من اسبوع غالبا الجميع -اعتقد- سمع خبر انفجار كنيسة القديسين فى الاسكندرية

عن نفسى سمعت الخبر وانا فى زهول غريب … مصر ولا العراق, فلسطين , باكستان ولا ولا تاهيتى حتى

قلبى اتوجع اوى بطريقة انا نفسى استغربتها فى بادىء الامر ممكن قبل كدا مكنتش بالنضوج ده عشان اقدر اكون فاهم جوانب القضية

لكن فى النهاية افتكرت كل اصدقائى الاقباط وقلبى اتوجع اكتر لما فكرت و افترضت ان الحادثة دى كانت اقرب وسمعت اسم صديق لى راح ضحيتها .. كان هايبقى ايه موقفى

انا مش كاتب البوست دى مدافعاا على الاسلام

لان المسلم الحق الفاهم لدينه مستحيل يعمل حاجة زى دى

لكن دعاه السلفية – بعضهم – كثيراا ما يدسون السم فى عقول الشباب و كل يوم فتوى ملهاش صلة بلدين وكل يوم فتوى غير عقلنية و شباب غلبان بيصدق ويجرى وراهم هاتفاا … الله يا شيخ

الدين حب اخوة انتماء ايمان مش قتل وتشريد

كلمة فى اذن كل الناس اللى محستش ده او قلبها متوجعش او كان الموضوع عادى او وصلو لدرجة الشماتة القذرة المتخفية فى صمت بغيض

لازم تفكرو فى حياتكم تانى لازم ماتكونوش زى الحيونات روحو هنا حاضر سمعاا وطاعا لا بلاش هنا حاضر برده

ربنا ادانا مخ او عقل نفكر فيه فى دينا نفكر فيه فى معتقداتنا

اعلم وقلتها اكثر من مرة ان الثوابت فى ديننا هما القرأن و السنة

غير ذلك فا هو خاضع لمناقشة … لانها راحت جيت هى اجتهادات

بدون خروج عن الموضوع . ده كان اخر كلامى فى الموضوع ده

حسبى الله ونعم الوكيل فى الارهاب الغاشم

اذا كان من الخارج فا ويل على الاعداء و الارهاب و كل منا ساهم فى ذلك من بعيد او قريب

و اذا كان من الداخل فا الويل الف مرة عليكم انتم وكراسيكم يا حكومتنا المبجلة

رأس الافعى بينكم .. رأس المال غايتكم حتى لو على نفوس الابرياء

فوقو بقااااااااا

الله لا يسامح كل من ساهم او تهاون فى قتل اخى المصرى الذى لا ذنب له ولا شىء غير انه كان يحتفل فرح ببداية عام جديد

الفرحة بقت دمعة ودم ابرياء

“يا كنايس يا جوامع .. وحدو الرب اللى سامع .. يا كل مصرى ف كل شارع حبنا طوق النجاه”

اوبريت مصر مفتاح الحياه

رسالة من

مصرى خايف على مصر

سلام

Tagged , , ,

60 days in Army nightmare

السلام عليكم

https://i1.wp.com/howiwillberich.com/wp-content/uploads/2007/09/pen-and-paper.jpg

بقالى شهرين  وكام يوم مش بكتب على المدونة مش لشىء اكتر من انها ازمة ورق ايون كما جرت العادة فى مجتماعنا المصرى واى اجرائات حكومية معقدة

من شهرين بدأت فى تحضير ورق الجيش التجنيد يعنى .. بس على ان اعترف انى كنت محظوظ كل الورق كل الاجرائات كانت ماشية وفى وقت مش طويل عكس ناس كتير

و الحمد لله برده ربنا خلصها على خير الحمد لله

وانا من الان وصاعداا

خريج ومعفى من الجيش و اقدس الحياه الزوجية

—–

اللذيذ فى الامر انى رجعت الثيم ده لانى بحبه وبحس انه منظم اكتر وحققت كام امنية فى قائمة الامانى

او كما تدعو ال wishlist يارب اقدر احقق الباقى .

شكراا لكل اللى دعو ليا

سلام

 

Tagged , ,

رمضان كريم

بقالى فترة كبير .. بعيد عن التدوين و ع المدونة لدرجة انها بقت متربة
المهم
رمضان كريم
۩˙·٠• ۩˙·٠• RaMaDaN KaReEm •٠·˙۩ •٠·˙۩
الجديد رمضان السنة دى
انى هاقضيه ف قاهرة المعز مع اخ سيد
اتمناه مش السيد اتمنى رمضان يكون عليا خير وبركة و احاول اجاهد شيطانى
وابقى ملتزم اكثر
وانتظرو تحديثات قريبااا

https://i1.wp.com/img697.imageshack.us/img697/2861/ramadan.jpg

Tagged ,

Black Honey (عسل اسود)

https://i1.wp.com/sphotos.ak.fbcdn.net/hphotos-ak-snc3/hs451.snc3/25854_121182627896366_120618597952769_301771_795356_n.jpg

خدتينى 100 ألم
انا شفت فيكى مرمطة وعرفت مين اللى اتظلم
ليه اللى جايلك اجنبى
عارفة عليه تطبطبى
وتركبى الوش الخشب وعلى اللى منك تقلبى

عارفة سواد العسل؟؟
اهو ده اللى حالك ليه وصل
ازاى قوليلى مكملة وكل ده فيكى حصل؟؟؟

يا بلد معاندة نفسها
يا كل حاجة وعكسها
ازاى وانا صبرى انتهى لسة بشوف فيكى امل!!؟؟

طرداك وهى بتحضنك
وهو ده اللى يجننك
بلد ماتعرف لو ساكنها والا هى بتسكنك

بتسرقك وتسلفك
ظلماك وبرضه بتنصفك
ازاى فى حضنك ملمومين وانتى على حالك كده!!؟؟!!؟؟

Tagged ,

الديمو- قراطية وانا

السلام عليكم … زوارى الكرام

انا النهاردة هاتكلم عن موضوعين مهمين جداا بالنسبة ليا قبلكم

اول موضوع وهو الديمو – قراطية , منذ ادركت الحياه من حولى وبداء ادراكى بما يطالب به شعبى وبما يقوله المسؤلين منذ هذه اللحظة وانا اسمع الجميع يطالب بالديموقراطية   واسمع ايضاا فى المقابل ممثلى الحكومة يصرحون ان فى ظل الديموقراطية ومصر تعيش ازهى عصور الديموقراطية

مين الصح ومين الغلط ؟؟ سؤال بداء يكبر ويكبر كل ما اكبر فى السن ولكنى فضلت ان ابحث عن الاجابة وحدى لعلى اصل لحل يهدنى ويخلينى اسكت , بدات ابحث عن معانى كلام الديموقراطية والدكتاتورية واحاول ان ااجد معانى وبديلها باللغة الانجليزية . وجدت وبعد بحث مضنى -بتتقال لما الواحد يتعب -ان احنا بنطلب الحاجة الغلط وكذلك الحكومة بتوفرلنا ما نطلبه اى الغلط فينا يا كبير .

حد يقولى وعرفت كدا ازاى يا بومبو -على طريقة معلقنا محمود بكر- ما نطلبه هو الديمو — قراطية , دعونا نفصل الكلمة لشقين اول شق الديمو وهى الحاجة الناقصة مش الكاملة تانى شق بالترجة الحرفية لجوجل قال معناها لنفسه ومحاولة منى لكشف معنى الكلمة كاملة وجدت اننا بنطالب بالشىء الخطاء بنطالب بحاجة ناقصة لنفسنا فا الطبيعى انهم يدولنا اللى بنطلبه نااااقص وبعمل نفس الطريقة مع كلمة الديكتاتورية او ال لديكتاتورشيب اى سفينة الدكتاتور – عزبه اهله بقا- فا طلع اللى انا اكتشفته صح جدااااااااااااااااااااااا احنا لازم نضحك على الحكومة ونطلب الحاجة من غير مساميات

بنطلب حياه كريمة وطفل يتعلم صح وشاب يقول رايه ومخفش لما حد من اهلى يعيو يلاقو الدوا و المستشفى اللى متسرقناش لا فى الفلوس ولا فى جسمنا مش عايزين كوسة ولا تحرش ولا معاكسات مش عايزين نضرب على قفانا عايزين كرامتنا برا وجوه قبل براا .. وانا كا شاب متعلمش من طفولته حاجة تخلينى اكون مبدع … بقولها وباعلى صوت انا عايز اولادى يتعلمو بلاش انا اولادى يا ريس اولادى يا حكومة . مش عايز اكتر من انى القيلهم رغيف وبيت ولبس ومدرسة مش عايز اشحت مش عايز اسافر برا اتهان لانى متهان فى بلدى وطالع اشحت برا واغسل صحون

تانى حاجة عايز اتكلم فيها هى كفااااااااااااااااااااااااااااية مش قصدى حركة كفاية مش قصدى المعارضة انا مش بتكلم عن الحكومة انا بتكلم معاكم ومعايا كا فرد من الشعب

كفاية شتيمة فيا وفى اهلى كفاية تشتم نفسك وفى اهلك مش كل حاجة هو اصلاا الشعب المصرى يستاهل ضرب الجزم اصل الشعب المصرى متربى على ال ………. اصل الشعب اصل الشعب … اللى بيتكلم مش مصرى ولا حاجة ؟؟؟

كلنا مخطئين والحل الامثل الوقتى ان كل واحد يغير من نفسه ويغير من اللى حواليه لو كل واحد عمل بما يرضى الله , معتقدش اننا ممكن نحتاج نقول الشعب المصرى ده ابن تييييييييييييييييييييييييييييييييييت

ممكن يكون الكلام ساخر بشكل غير منطقى بس حبيت اشرح وجهة نظرى واحاول ابداء بنفسى واللى حواليا واخليهم يفهمو اللى بعمله والله اعلم ممكن فى يوم اكون صح او اموت من غير ما حد يترحم عليا

سلام

Tagged , ,