اعقل

 

السلام عليكم

النهاردة مش هاتكلم عن حاجة سياسية او تشجيعية اكتر من انها مناقشة لموضوع ما .. الموضوع من الموضوعات اللى بعض الناس بيسموها نحنحة .. الكلام عن الارتباط و الحب

كلنا كا شباب من ولاد وبنات فى حتة فى دماغنا ديما بتزقنا للأرتباط فى ناس بتنجرف بسزاجة وناس بتبقى عندها مبادىء وخطوط حمراا ماحدش بيعديها لكن تعالو نفكر شوية فى بعض التفاصيل

كل واحد مننا عنده فكرة عن الارتباط و ليه عايز يرتبط هاخدنى كا مثال بما انى انا اللى بتكلم – حد ليه شوق فى حاجة – انا لما بفكر ارتبط انا بفكر بشكل مختلف يعنى مش بسيب لشهواتى التفكير بمعنى اصح و اكثر صراحة يعنى لا يستهوينى الانثى الاكثر انوثة الاوفر او اللى بتبقى ضاربة تلت اربع مكياج الدنيا فى وشها – ده مش معناه انى عايز ارتبط بقردة النوع ده للمعاكسة فقط – لكن انا اصلاا بفكر بشكل مختلف ممكن يكون مختلف عن معاليك او متشابه جداا .. انا بختار رفيق لرحلة بما يحمله من صفات ارتاح معاها وانا فى طريقى لحلمى ولحلمها هى كمان, ده يديك سبب انا ليه عندى موضوع الجمال ده مرتبة تانية لكنها مهمة زى ما قلت اكيد مش هاتجوز قردة

فى الفترات الاخيرة او تجربتى الوحيدة اللى كانت حقيقية كانت للأسف ايون للأسف بقلبى وده كان اكبر غلط! ليه غلط لان اكتشفت ان العاطفة لما تشتغل بعنف بتضيف على شخصيتك حاجات مش مستحبة ومن اهمها على الاطلاق الضعف .. بتضعف جداا ادام الشخص اللى بتحبه لحد الطفولية وده هايظهر حاجات مش لطيفة انها تظهر لاى حد عشان كدا بقول ان للأسف كان بقلبى.

الضعف ده خلانى الغى عقلى فى كثير من الحاجات – المشاكل يعنى – وده سبب فى مشاكل اكبر لانى لو كنت حكمت عقلى كان ممكن تكون المشاكل دى اتفه ما يمكن لكن خلينا نعترف انك بشكل او بأخر هاتضعف هاتضعف ده شىء غير قابل للجدال حتى لو انت مين خليك صادق مع نفسك.

طيب ايه الحل هو بقا اللى انا عامل الموضوع ده عشانه اصلاا الحل ده من وجهة نظرى يعنى ممكن تكون صح او لا .. مفتوح النقاش فى اللى هاقوله ده

انا شايف ان الحل هو وجود عقلك فى اكتر من سبعين فى المية من الاختيار من الاول وانت ع البر .. اوعى تسيب لقلبك الاختيار – عارف حملة اوعى ايون اوعى تجرب – بما اننا اتفقنا – على اعتبار اننا اتفقنا – اننا بنضعف بنضعف لا محالة فا اضعف ادام حد يقدر ضعفك حد يضعف هو كمان عشان يحققلك اللى انت عايزه حد مايستغلش ضعفك انه يستقوى عليك حد يقدر انت بتعمل ايه عشانه عشان يقدر ضعفك وانكسارك ادامه ده مش ذل لكن للأسف ده الحب .. بحكم تجربتى القصيرة جداا بحجم اد ايه كئابة ادتنى فى وشى الا انها كانت تجربة اتعلمت منها حاجات كتيرة اهمها انى مخفش انى اقول انى مريت بتجربة فاشلة الا انى اتعلمت منها ازاى بقا مافشلش عرفت طريقة للفشل زى ما بيتقال .. عرفت ازاى اتعامل و امتى ابقى شرير و امتى ابقى نحنوح – اتمنى – قدرت نعمة العقل اللى ربنا قدمهالنا عشان نستخدمه فى كل تفصيلة فى الدنيا

حكم عقلك ومتخليش حد يستغل ضعفك او انت تستغل ضعف حد .. كن على اد المسؤلية فقط وبس

بس خلاص

مش فاهمنى!

ايه بقا! مالك؟

كتير بحس بالخنقة و الملل اتعودت عليه عادى كا مواطن مصرى وشاب كمان وعدى على مرحلة الثانوية العامة … طبيعى جداااا انى امر بحلات اكتئاب وعلاقات فاشلة وعلاقات ناجحة

بقالى فترة مش مرتاح مش مكتئب ومش سعيد معنديش توصيف للحالة اللى عايشها الصراحة لو قلت اى وصف هاكون كداب

انا مليت من كل القيود ومليت من كل اللى الحاجات اللى احنا خدنها مسلمات مليت من كونى انا! … عايز اكون حاجة مختلفة مليت عاداتى اليومية ومليت حتى شغلى مليت التاكسى اللى بركبه بقيت عايز امشى ولما بامشى ببقا عايز اركب رخامة بقا اللى انا فيه ده ماتحلش برحلة لاى مكان مفتوح بالعكس بروح هناك بيبقى الاستمتاع وقتى جداااااااااا خلص خلصت الحكاية معدتش زى زمان حاسس حلاوة الشىء … فقدت حتى انا حلمى ايه هل انا حلمى انى ابقى معايا فلوس ولا يبقى معايا علم ولا الاتنين طيب ازاى اوصل و ازاى ماوصلش … رغم انى ابدو لكثير من الناس شخص متفائل الا انى بدأت احس ان زى بلياتشو بضحك من برا وجوايا جروح الدنيا و الدين … حالة من الـــ مش عارف ايه

مجروح على مهموم على مخنوق على وحدة على حاجات تفرح بس مش حاسس بطعمها …. اول مرة انا مكنش فاهمنى طبيعى جداا انك تكون مش مفهوم لغيرك لكن لما متبقاش فاهم نفسك بيخلى مؤشر حياتك يحمر ويكسر عدادات الاحساس و اللذة فى حياتك؟

هل حل كل اللى انا فيه ده .. انت عايز ايه؟ ده لو انا شوفت حد زيي كدا هاسأله كدا مع نوع من الفلسفة اللى خدتها من كتب التفاؤل الى زهقت من حروفها هاقنعه ان الحياه فيها الوان كتير ماتشفتش وهاخليه مزقطط … مش عارف اعمل كدا مع نفسى مش عارف اكون عندى هذا الثقل من القبح الفكرى وفضلات مرمطة الحياه واكون قادر افتكر انا حلمى ايه؟؟

فى العادة مش بنشر الحاجات اللى فيها سودويات زى دى … بس هانشرها بقا رخامة فيها

Smile :)

بقالى كام يوم بتسأل سؤال واحد مالك مبسوط كدا ؟؟ شكلك مبسوط النهاردة ليه ؟ سؤال يصحبه غمزة

وكأن الغمزة اللى هى مفهوم عنها انها الحب هو الشىء الوحيد اللى بيحققلك السعادة وكأنك ضعيف اوى لدرجة ان لازم حد تانى يسعد حياتك؟

لا الاجابة بقا انى قررت انى ابقى اقوى منك اه مستناش حد او شغل يسعدنى قررت املى كوبايتى بايدى مش استنى حد قررت اضحك واعيش كل لحظة فى حياتى لانها مش هاترجع تانى

كل ساعة بتروح فى حياتك مش هاترجع لكن الفرص بتروح وتيجى لا وبتيجى احسن كمان صدقنى … ملعون ابو النكد و الغم واللى ينكد عليا ولا ميسعدنيش

انا قررت ابقا نفسى قررت ابقى اقوى قررت اعيش اليوم كأنه اخر يوم فى حياتى اضحك و اخرج و العب و اكل اكلة غالية جداا و ابقى مبسوط قررت اجيب هدوم زى منا عايز قررت اقراا فى اللى بحبه و اشتغل بحب و بسعادة و ابتسم فى وش كل واحد لعل وعسى اكون سبب ان وشه يتفرد ويبتسم

اوعى تقول انا تعيس انا حزين انا مكتئب ده بالظبط زى ما تجيب ورقة بيضة وتحدف عليها تراب ما هى هاتتوسخ ما تحاول تحدف عليها ورد تعطرها تنضفها

اوعى تستنى حد يسعدك انت مش ناقص ايد ولا رجل ولا عقل عشان تسعد نفسك بالعكس فى ناس معندهاش االلى عندك ومبسوطين جداااااا امال انت يا حزين مالك بقا؟؟

انا قررت انى اعيش حياتى كمان قررت ان لحظة موتى اموت وانا مبتسم اصل انا مش هاعيش اللحظة دى مرتين … ابتسم

باب النجار مخلع

باب النجار مخلع كلمة كل ما اسمعها احسها اكبر من انها تتقال فى موقف خفيف  بحسها كلمة تقيلة كلمة تفسر وظيفة البنى ادم فى الدنيا

بمعنى ان طبيعى انك لما تلاقى حد واقع فى مشكلة تحاول تساعده  والالطف انك ممكن تقوله افكار بديهية جدا تلاقيها غايبة عنه ايون ليه يعنى ؟

لان فى بعض الاحيان او فى الاغلب الشخص اللى بيقع فى المشكلة بيبقى منظوره للموقف صغير اوى من على الارض فى وسط المشاكل مع انك لو طلعت بالكاميرا شوية للارض كلها هاتشوف تفاصيل كتير جداا بديهية اوى فا طبيعى تلاقى حاجات بديهية اوى فى مشكلة صديقك تسمع منه وتحلها … الطبيعى  اكتر انك نفسك لما تقع فى مشكلة تحسك مشلول مش فاهم ايه العمل و ايه اللى يحصل تستعين بصديق ممكن تكون مساعده اول امبارح يساعدك لنفس الاسباب .. اه منطقى جداا ان الانسان يحل مشاكله بنفسه بس المنطقى اكتر ان حل اللى شايف الموضوع من منظور اكبر هو اكثر واقعية و اكثر صحة

ده بيفكرنى بقا بدور البنى ادم فى الدنيا انه يساعد غير وغيره يساعد غيره وهاكذا ربنا جمعنا سواا ف الحياه مش لسبب اكتر مننا اننا نتعلم مننا ونشوف مواقف ونساعد بعض فى اننا نعمر الارض مثلاا تعمير بقا تنموى تربوى تقنى اى تنمية وتعمير

الحمد لله ان ربنا رزقنا بينا

اها متنساش ابتسامتك فى وش اى حد تعرفه او لا مش بس صدقة لا هاتساعده كتير اوعى تبخل على حد

بس

سلام

وحشتينى

وحشتينى .. وحشنى دلعك و ابتسامتك .. وحشنى شوقى ليكى بعد ثانية من وداعنا … وحشنى اسمك على الموبيل وحشنى صورتك فى عنياا .. وحشنى احلامى معاكى و موتى فى حبك .. وحشنى عٍندك وكٍبرك

وحشنى رنتك و صوتك وحشنى حتى غلاستك وشقاوتك

وحشنى غيرتك و كلمة هادبحك … وحشنى لمعة عنيكى وانا بقولك بحبك

الصمود

سلطة تنفيذية خاينة للثورة و سلطة تشريعية خاينة للثوار و الشهداء و شعب راضى باى شىء كان خيراً او شراً و اعلام سفيه! .. و الامل قلة قليلة مندسة

 تحية لكل ثائر صامد تحية لكل ثائر صوته راح من كلمة سلمية

وتحية لكل نقطة دم نزلت من شهيد او مصاب عشانكم شايلين روحنا على كفنا عشان مطالبكم وحقوقكم قابلين يتقال علينا بلطجية وخونة وعملاء

فخور انى بلطجى على كل فاسد

وفخور انى عميل للحق و الحرية و الكرامة

و فخور انى خاين لكل اللى اتربينا عليه من خوف و خضوع للظلم

 

الاحترام

امبارح كنت على سفر و حصل موقفين ادامى خلونى اصاب بحالة من القرف و الموقفين شبه بعض جداا .. عنوانهم عدم الاحترام

الخلاصة

فى كل علاقة فى الدنيا على كوكبنا وعلى كوكب اخواتنا الفضائين يوجد مشاكل وده طبيعى وهى فى الاغلب مش مشاكل هو اختلاف فكر .. اختلاف الفكر لا يعنى اننا اعداء   … الاهم الاهم ان يبقى الاحترام هى الوسيلة المثلى للتواصل وتلاقى الافكار من اجل هدف واحد

Resignation …

السلام عليكم

ايها الاخوة المواطنون .. اتحدث اليكم فى هذه الظروف العصيبة حديث من القلب … حديث الاب لابنائه

لقد قررت اليوم ان اتوقف عن مجال التدريب لاجل غير مسمى لاسباب شخصية ومستقبلية من الدرجة الاولى بجانب اننى بحاجة الى التفرغ  لوظيفتى الاولى و الاساسية و  ومستقبلى بشكل عام

بعد 5 سنين من العمل فى هذا المجال .. ومؤخراا التعامل مع باشمهندس اسلام الزيات الاخ و الصديق فى مركز اوت بوكس

ولقد تشرفت بذلك كثيراا و اليوم انهى التعامل مع المركز بشكل رسمى ونهائى

شكراا

For Your Dream …

اقرأ البوست من تحت لفوق لو عايز تقراه … انا بس بحتفظ بالكلمتين دول لانى هاحتاجهم من الوقت للتانى

لو انت كمان محتاجهم انشرها ممكن حد غيرك يحتاجها

 

When geeks be in relation!

من فترة بدأ موسم الارتباط عندى اصحابى فيه اللى ارتبط رسمى وفيه اللى بيكافح عشان يرتبط رسمى 

الغريب فى الامر اللى خلانى احلل الموضوع تشابه الحالات .. يعنى ايه؟

بما ان كل اللى اعرفهم او معظمهم من الجيكس او المهاويس وجدت ان فى طريقتين من التفكير لما بنيجى نرتبط حتى الان لا اعلم ان كان لسبب واضح ولا من قبيل الصدفة 

اول النوع وهو التزاوج الجيكى بمعنى ان جيك يرتبط بجيك اخر 

تعالى نشوف المزايا 

اولاا حياتهم هاتبقى متوافقة الى حد كبير فى التفكير فى الطموح وممكن الاراء وطريقة المعيشة وهايقدرو يساعدو بعض وينجحو مع بعض كل واحد فاهم التانى بشكل كبير 

ثانياا وده الاهم انهم لما يجو يألشو على بعض الش جيكى هايفهموه بسرعة 

العيوب

العيوب انهم هايفقدو نص العالم الاخر .. تصور شخصين نفس الاهتمامات نفس الطموح نفس الاراء او ان اختلفو فا هما بيتكلمو فى نفس الموضوع نص العالم مفقود زنقو بعض فى اوضة وسابو الشقة فاضية

اما النوع التانى وهو الارتباط المثالى ارتباط هادىء وصامت بعض الشىء 

غالباا ما يرتبط هذا النوع مش شخصية متعلمة وجميلة مزة يعنى … وفى الاغلب انهم بيكونو من كلية صيدلة حتى الان معرفش ايه الاسباب لكن بدون ترتيب انا ليا اصحاب كتير مرتبطين بصيادلة! 

لما سألت كانت الردود هى حلول العيوب فى التزاوج الجيكى وهى انى محتاج لما اروح اتكلم فى التليفون انسى الشغل محتاج اكتشف نصف العالم الاخر طموح فى عالم اخر مواضيع مختلفة حياه استكشافية 

المزايا هو انك هاترتاح من الكلام فى الشغل وهاتتكلم فى مواضيع متعرفهاش وتعرف عنها هاتكتشف نصف الكوكب الاخر هاتطلع من الاوضة اللى انت فيها وتشوف بقية الشقة حياه مختلفة بمعنى الكلمة 

كمان ديما هاتشوفك خارق انسان غير عادى بتحول افكارها لحقيقة بتحاول احلامها لالوان 

اما العيوب وهى انك عشان تحقق المزايا لازم يكون بينكم توافق مبدائى وده مش ديما بيحصل بسهولة 

لا وكمان ممكن تحس انها مش بتساعدك ملهاش دور حقيقى فى حياتك 

و الاهم انك مش هاتعرف تألش عليها او هاتفتحلك مجالى من الالش متعرفوش وهاتتهزم

كنت من فترة بسأل صديقى ايهاب خطاب فى الموضوع ده الله يمسيه بالخير غالباا بيتمرن على سحل المواطنين فى الجيش 

فكرنى بمقولة خالدة لدكتور احمد خالد توفيق … لما انت وخطيبتك تحبو ورك الفرخة مين هاياكل نص الفرخة ! مين هاياكل نص الفرخة التانى 

فى حالتى انا اللى هكلها

كل واحد يفكر كدا ويعرضلنا تجاربه فى الموضوع وهل يؤكد ام ينفى تحليلى 

سلام